Kryeministri Edi Rama u shpreh sot gjatë konferencës së përbashkët për shtyp me Përfaqësuesen e Lartë të Politikës së Jashtme dhe Sigurisë në BE, Federica Mongherini, se Shqipëria nuk do të ngrejë mure për të bllokuar emigrantët, por as do të hapë portat. Shefi i ekzekutivit deklaroi se vendi ynë do të marrë pjesën e vet të përgjegjësisë të krizës së emigrantëve sipas një projekti të Bashkimit Europian. Indirekt, kryeministri s'kurseu kritikat ndaj vendeve të BE që jetojnë me frikë dhe ndërtojnë mure.
"Shqipëria është një vend i vogël por asnjëherë s'i ka bërë bisht përgjegjësisë së çdo sfide të përbashkët me partnerët tanë. Jemi besnik të vlerave dhe parimeve të Europës, që ndërtuan ata që na lanë në trashëgim projektin e BE. Mbetem i gatshëm të marrim pjesën tonë të përgjegjësisë edhe në këtë sfidë, por nga ana tjetër, jemi të vetëdijshëm që s'e kemi as fuqinë dhe as delirin se mund të shpëtojmë Europën dhe botën. Nuk do të hapim kufijtë dhe nuk do të ndërtojmë mure, por jemi të gatshëm të bashkëpunojmë dhe të marrim pjesën tonë të përgjegjësisë në bazë të një projekti Europian. Kjo është një sfidë Europiane, kjo nuk është një sfidë e Greqisë, as e Italisë dhe s'ka si të jetë sfida e Ballkanit dhe aq më pak e Shqipërisë. Është sfida e BE. Dhe brenda këtij BE jemi dhe ne që, për momentin jemi E pa B. Edhe pse jemi sjellë në këtë rajon si qytetarë Europianë të dorës së parë, ndërsa ata që e kanë atë B përpara janë sjellë si "kategoria B"", u shpreh Rama.
