احمد الديب تيرريري

كشف المدون "أحمد محسن"، حقيقة المطرب "أحمد الديب" الذي تحول إلى مادة للسخرية بالكوميكس والفيديوهات الساخرة على السوشيال ميديا، بعد تجاوز مشاهدته حاجز المليون، مؤكد إنه متأخر عقليًا، على حد تعبيره.


وكتب المدون أحمد محسن على حسابه بموقع التواصل الاجتماعي "فيسبوك"، اليوم الثلاثاء: "حالة إنسانية، النهاردة عايز اتكلم عن حاجة مختلفة شوية، وممكن يكون موضوع صادم لبعض الناس، اللي في الصورة ده شاب بينضحك على أداءه كتير في أغنية منتشرة اليومين دول اسمها (ريريري.. ايأ ايأ.. زكي يازكي) اتعمل عليه كوميكسات تريقة في اكبر الصفحات.. ومقاطع من أكبر مشاهير الفيديوهات.. وكمان فيه فيديوهات تقليد عليه عدت المليون مشاهدة".


وتابع: "وطبعا ده كله ادى لهجوم كبير ارضا وبحرا وجوا عالشاب ده من عدد كبير من الناس بدعوى التحشيش والتمثيل وغيره، المهم بعد البحث المستفيض عنه بياناته كالتالي: اسمه: أحمد الديب، عمره: 32 سنة، حالته الاجتماعية: متزوج وعنده 3 أولاد، محل إقامته: ميت غمر - الدقهلية".

وأضاف: "طب ايه اللي بيخليه يعمل كده ؟، الصدمة أن الشاب ده عنده ( تأخر عقلي).. وشغال (عامل) في مستشفى (ميت غمر) تحت قانون الـ 5 % لذوي الاحتياجات الخاصة، واللي بيكفل لهم حق (العمل والسكن)".

وواصل:"للأسف بيتم استغلال إعاقته من متعهدين الأفراح الشعبية.. وعلموه من فترة يطبل وحفظوه شوية أغاني، مأساة الشاب ده دلوقتي ان بسبب إعاقته متعهدين الأفراح دول بيفوتوا عليه في البيت وياخدوه معاهم أفراح هم متفقين عليها.. بالنصب وبالاستغلال لحالته، ده طبعا عشان يضحكوا عليه الناس، ويستغلوه بالشكل اللي انتم بتشفوه.. ومش هتلاقوا له فيديو واحد وهو بيتكلم طبيعي من مئات الفيديوهات له عاليوتيوب.. وطلع في الفيديو ده قال إن متعهدين أفراح منهم بتسرق منه فلوسه ( 15 جنيه)".


وتابع: "طبعا فيه قوانين كتير لتجريم استغلال الشخص المتأخر أو المعاق.. لكن الله اعلم محدش بيطبقها في حالة واضحة وضوح الشمس زي دي ليه، وأصحاب الأفراح اللي زي دي بيرضوها ازاي ؟!اللي خلاني اكتب بوست زي ده لما عرفت ان عنده (3 أطفال أصحاء).. ومسيرهم يوم يشوفوا أبوهم في وضع زي ده.. ويعرفوا أن كان فيه ناس بتستغله ويخلوا الدنيا كلها تضحك على إعاقته وهو لا حول له ولا قوة".


وأردف: "كل اللي بتمناه أن (جهة رعاية نفسية وعقلية) تتبنى حالته؛ لأن الصراحة وسط المشاهدات المليونية لفيديوهاته وكوميكسات التريقة عليه.. بياخد كمية شتايم ودعاوي من الناس يشيب لها الولدان.. وهو طبعا معندوش مقدرة الرد عليهم، فياريت نعمل ثواب ونشارك حالته او نعمل اشارة لمسئول.. لعل حد يتكفل بيه ويحميه من اللي بيحصله".