အိန္ဒိယနိုင်ငံ၊ ကက်ရ်ှမီးယားဒေသက စစ်စခန်း တစ်ခုကို စစ်သွေးကြွတွေ ဝင်ရောက်တိုက်ခိုက်မှုကြောင့် လုံခြုံရေး တပ်ဖွဲ့ဝင်တွေနဲ့ ရင်ဆိုင်တိုက်ပွဲတွေ ဖြစ်ပွားခဲ့ပါတယ်။
အောက်တိုဘာ ၃ ရက်မှာ ဟွမ်ဟာမာ လေဆိပ်နားက လုံခြုံရေး တင်းတင်းကျပ်ကျပ် ချထားတဲ့ နယ်ခြားစောင့် စစ်စခန်းကို စစ်သွေးကြွတွေက အလစ်အငိုက် ဝင်ရောက်တိုက်ခိုက်ခဲ့တာပါ။ အိန္ဒိယ စစ်တပ်က စစ်သွေးကြွ နှစ်ဦးကို သုတ်သင်ရှင်းလင်းခဲ့ပြီး နောက်တစ်ဦးကို ရှာဖွေနေကြောင်း ပြောကြားခဲ့ပါတယ်။ အပြန်အလှန် ပစ်ခတ်မှုတွေကြောင့် နယ်ခြားစောင့်တပ်က စစ်သည်တစ်ဦး ကျဆုံးပြီး သုံးဦး ဒဏ်ရာရခဲ့တယ်လို့လည်း သိရပါတယ်။
မျက်မြင်တွေကတော့ စစ်စခန်းထဲမှာ သေနတ်သံတွေနဲ့ ပေါက်ကွဲသံတွေ ကြားနေရတယ်လို့ ပြောပါတယ်။ တိုက်ပွဲ ဖြစ်ပွားနေတဲ့ ပတ်ဝန်းကျင် ဧရိယာက ဒေသခံတွေ ထွက်ပြေး တိမ်းရှောင်ခဲ့ရသလို လုံခြုံရေး တပ်ဖွဲ့ဝင်တွေကလည်း အဲဒီနေရာကို ပိတ်ဆို့ထားလိုက်ပါတယ်။
ကက်ရ်ှမီးယားဒေသဟာ ပါကစ္စတန်နဲ့ အိန္ဒိယတို့ကြား ပိုင်ဆိုင်မှု အငြင်းပွားနေတဲ့ နယ်မြေတစ်ခုဖြစ်ပြီး အိန္ဒိယ အစိုးရကို ဆန့်ကျင်တဲ့ စစ်သွေးကြွ အုပ်စု တော်တော်များများလည်း အခြေစိုက် လှုပ်ရှားနေကြပါတယ်။ အိန္ဒိယနဲ့ ပါကစ္စတန်တို့ဟာ စစ်ပွဲသုံးကြိမ် ဖြစ်ပွားခဲ့ရာမှာ နှစ်ကြိမ်က ကက်ရ်ှမီးယားဒေသကို ပိုင်ဆိုင်ခွင့် အငြင်းပွားရာက စတင်ခဲ့တာပါ။
အိန္ဒိယ အစိုးရက ပါကစ္စတန်ဟာ နယ်စပ်မှာရှိတဲ့ စစ်သွေးကြွ အုပ်စုတွေကို ထောက်ပံ့ကူညီနေကြောင်း စွပ်စွဲထားပြီး ပါကစ္စတန် အစိုးရကတော့ အဲဒီစွပ်စွဲချက်တွေကို အစဉ်တစိုက် ငြင်းဆိုထားပါတယ်။