वाशिम जिल्ह्यातील वाशिम-पुसद मार्गावरील रेल्वे क्रॉसिंगवरील उड्डाण पुलाचे काम रेंगाळले आहे. प्रजासत्ताक दिनी पुलाचे उद्घाटन होऊन पुल रहदारीसाठी खुला होईल अशी आस जिल्हावासीयांना होती. मात्र सार्वजनिक बांधकाम विभागाच्या कर्मचाऱ्यांकडून पुलाच्या पदपाथ आणि रंगरंगोटीचे काम संथ गतीने सुरू आहे. उड्डाण पुलाचे उद्घाटन गेल्या अनेक दिवसांपासून लांबणीवर पडण्याचे चित्र दिसत आहे. दक्षिण मध्य रेल्वेच्या प्रवासी गाड्यांसह मालवाहतूक करणाऱ्या रेल्वेच्या फेऱ्या वाशिम रेल्वे स्थानकातून होतात. त्यामुळे अनेकवेळा रेल्वे गेट बंद होत असल्याने रुग्णवाहिकेसह शेकडो वाहनांच्या दूरवर रांगा लागतात. त्यामुळे रेल्वे गेट जवळची वाहतूक कोंडी केव्हा मिटणार असा प्रश्न वाहनचालकसह स्थानिकांना सतावत आहे. काही दिवसांपूर्वी उड्डाणपुलाच्या कामाला वेग आला होता. संबंधीत कंत्राटदारांनी काम वेळेत पूर्ण करण्याचे संकेत दिले होते. त्यामुळे रहदारीच्या गचाट्यात सापडलेल्या वाहन धारकांनी तेव्हा सुटकेचा निश्वास सोडला होता. परंतु सुरु असलेल्या कामाची गती पाहता अजून किती दिवस रहदारीचा त्रास सहन करावा लागणार असा प्रश्न नागरिकांना पडला आहे. पुलाच्या कामाची गती वाढवून त्वरीत हा पुल रहदारीसाठी खुला करण्यात यावा अशी मागणी प्रवासी वर्गांकडून केली जात आहे.
