ట్రాఫిక్ ఉల్లంఘనలకు పాల్పడి చలానాలు పెండింగ్‌లో ఉన్న వాహనాలకు రేపటి (మార్చి 1)నుంచి రాయితీ ప్రకటిస్తున్నట్లు పోలీస్ శాఖ ప్రకటించింది. చలానాలు పెండింగ్‌లో ఉన్న వాహనదారులు ఆన్‌లైన్ లేదా మీ సేవలో జరిమానా మొత్తాన్ని చెల్లించవచ్చని తెలిపింది. ఈ సదవకాశం మార్చి 1 నుంచి 30వ తేదీ వరకే ఉంటుందని హైదరాబాద్ ట్రాఫిక్ జాయింట్ సీపీ రంగనాథ్ సోమవారం వెల్లడించారు. హైదరాబాద్‌తో పాటు అన్ని జిల్లాల్లోని వాహనాలకు రాయితీ అమలు చేస్తున్నామని, ఈ అవకాశాన్ని వాహనదారులు వినియోగించుకోవాలని కోరారు. అయితే మార్చి 30 తర్వాత పెండింగ్ చలాన్లు ఉన్నవారికి ఈ రాయితీ వర్తించదని పేర్కొన్నారు.
