പിക്കപ്പ് വാനിൽ നിന്ന് ഇരുമ്പ് കമ്പികള്‍ റോഡിലേക്ക് തെറിച്ച് വീണു; ബൈക്ക് യാത്രികന് ദാരുണാന്ത്യം

തൃശൂർ: കുട്ടനല്ലൂരിൽ ഓടിക്കൊണ്ടിരിക്കുന്ന പിക്കപ്പ് വാനിൽ നിന്ന് പുറത്തേക്ക് വീണ ഇരുമ്പ് കമ്പി ശരീരത്തിൽ തുളച്ചു കയറി ബൈക്ക് യാത്രികന് ദാരുണാന്ത്യം. കുട്ടനല്ലൂർ സ്വദേശി ഷെറിൻ ജോൺ ആണ് മരിച്ചത്. ഇന്ന് രാവിലെ പത്തര മണിയോടുകൂടിയായിരുന്നു അപകടം നടന്നത്. കുട്ടനല്ലൂർ ഹൈലൈറ്റ് മാളിന് സമീപത്താണ് ബൈക്ക് യാത്രികന് ദാരുണാന്ത്യം സംഭവിച്ചത്. ഓടിക്കൊണ്ടിരിക്കുന്ന പിക്കപ്പ് വാനിൽ ഉണ്ടായിരുന്ന ഇരുമ്പ് കമ്പികൾ പുറത്തേക്ക് വിഴുകയായിരുന്നു. ബൈക്കിൽ വരികയായിരുന്ന കുട്ടനല്ലൂർ സ്വദേശി ഷെറിൻ ജോണിൻ്റെ ശരീരത്തിൽ ഇരുമ്പ് കമ്പികൾ തുളച്ചുകയറി. യാതൊരു വിധത്തിലുള്ള സുരക്ഷ മുൻകരുതലുകളും പാലിക്കാതെ പിക്കപ്പ് വാനിൽ കമ്പികൾ കൊണ്ടുവരുകയായിരുന്നു. മുന്നിൽ പോകുകയായിരുന്ന ഷെറിൻ ഓട്ടോ പെട്ടെന്ന് ഇൻഡികേറ്റർ ഇടാതെ തിരിച്ചപ്പോള്‍, ബ്രേക്ക് പിടിക്കുകയായിരുന്നു. ആ സമയത്ത് പുറകെ വന്ന പിക്കപ്പ്  ബ്രേക്ക് പിടിച്ചപ്പോൾ, കമ്പികൾ പുറത്തെക്ക് ചാടുകയായിരുന്നു. പെട്ടെന്ന് തന്നെ നാട്ടുകാർ ഇയാളെ ആശുപത്രിയിൽ എത്തിച്ചെങ്കിലും മരണം സംഭവിക്കുകയായിരുന്നു. അപകടം ഉണ്ടാക്കിയ പിക്കപ്പ് വാൻ പൊലീസ് കസ്റ്റഡിയിലെടുത്തു. ഷെറിൻ്റെ മൃതദേഹം ജില്ലാ ആശുപത്രി മോർച്ചറിയിലേക്ക് മാറ്റും. ഫയർഫോഴ്‌സ് ഉടൻ സ്ഥലത്തെത്തുകയും ഗതാഗതം പുനസ്ഥാപിക്കുകയും ചെയ്‌തു. അപകടകരമായ രീതിയിൽ വാഹനം ഓടിച്ച പിക്കപ്പ് വാൻ ഡ്രൈവർക്കെതിരെ കേസെടുക്കാൻ സാധ്യതയുണ്ട്.