اما على اعتبار ما هو كائن فاحنا في نهاية اليوم الاول للتصويت في جولة الاعادة ما بين اتنين مرشحين الفريق احمد شفيق والدكتور محمد مرسي.. اللي هيفوز منهم برئاسة مصر لمدة اربع سنين جايين، مش عارفين لسة هيحلف اليمين الدستورية قدام مين بعد حكم المحكمة الدستورية اللي منطوقه بيحل الثلث الفردي من مقاعد مجلس الشعب وحيثياته بتحل المجلس كله.. مش عارفين هيحلف على احترام اي دستور، لما الدستور نفسه لسة في علم الغيب، مش عارفين مين اللي هيكتبه: الجمعية التاسيسية اللي انتخبها مجلس الشعب المنحل، ولا جمعية تاسيسية جديدة ومين اللي هيشكلها وباي حق وباي معايير وباي آلية؟!!! وبالتالي فاحنا عارفين اننا بننتخب رئيس مش عارفين صلاحياته، ولا عارفين حتى ان كانت مطلقة ولا محدودة.. مش عارفين ان كان التشريع كمان هيكون من صلاحياته بعد المجلس العسكري ما يسلمه السلطة ولحد ما ننتخب مجلس شعب جديد ولا سلطة التشريع هتفضل في ايد المجلس العسكري وفي الحالة ديه مانقدرش نمنع نفسنا من سؤال"طب بامارة ايه"؟!.. لكن اللي احنا عارفينه ومتاكدين منه ان الرئيس اللي جاي وايا كانت صلاحياته فهو رئيس بلا رقابة ولا رقيب ولحين اشعار آخر، اللهم الا الرقابة الشعبية وربنا يقدره ويعينه عليها
