صحيح إن الثورة قامت في يوم وليلة ولحد حتى ما قامت ما كانش حد يصدق ولا يخطر له على بال ولا حتى كبارات البلد ولا حتى كبارات العالم، إنها ثورة وإن الشعب يريد وإن اللي عايزه هو اللي هيكون مهما كان التمن، لكن دة ما يمنعش إن الثورة في النهاية شئنا أم أبينا فعل تراكمي وبنت شرعية لكل الحركات الاحتجاجية اللي نشأت وترعرت في البلد ديه خلال السنين اللي فاتت لحد ما آن الأوان.. من ضمنها ويمكن من أولها حركة كفاية، اللي زي النهاردة من سبع سنين كانت واقفة وقفتها الأولى في عز الضهر على سلالم دار القضاء العالي.
