ମିଳିଲାନି ଡ଼ଙ୍ଗା, ଅସୁସ୍ଥ ଜେଜେ ମାଆକୁ ଟିୟୁବରେ ଭସାଇ ଘରକୁ ଆଣିଲା ନାତି

ଯାଜପୁର: ଅସୁସ୍ଥ ଜେଜେ ମାଆଙ୍କୁ ଟିୟୁବରେ ଭସାଇ ଭସାଇ ଘରକୁ ଆଣିଲା ନାତି । ଯାଜପୁର ଜିଲ୍ଲା ଦଶରଥପୁର ବ୍ଲକ୍ ଧନିପୁର୍ ଗାଁରେ ବନ୍ୟା ବିପନ୍ନଙ୍କ ବିକଳ ଚିତ୍ର । ଗାଁରେ ବନ୍ୟାଜଳ ମାଡ଼ିଯିବା ପରେ ଯାତାୟାତ ପାଇଁ କୌଣସି ଡ଼ଙ୍ଗା କିମ୍ବା ମଟର ବୋଟ୍ ନଥିବାରୁ ଟିୟୁବ୍ ସାଜିଛି ବିକଳ୍ପ । ଯଦି କାହାର ଦେହ ଖରାପ ହୁଏ ତେବେ ତାଙ୍କ ପାଇଁ ସାହାରା ସାଜିଛି ଟିୟୁବ୍ । ସେପଟେ ଅସୁସ୍ଥ ଜେଜେ ମାଆଙ୍କୁ ନାତି ଟିୟୁବ୍ ସାହାଯ୍ୟରେ ଭସାଇ ଭସାଇ ଘରକୁ ନେଉଥିବା ଚିତ୍ର ସାମ୍ନାକୁ ଆସିଛି ।ଗତ ଶୁକ୍ରବାର ସନ୍ଧ୍ୟାରେ ଉକ୍ତ ଗାଁର ଜଣେ ବୃଦ୍ଧାଙ୍କ ଦେହ ଖରାପ ହୋଇଥିଲା । ବନ୍ୟାପାଣିରେ ଗାଁ ଦାଣ୍ଡ ବୁଡ଼ି ଯାଇଥିବାରୁ ଆମ୍ବୁଲାନ୍ସ ତାଙ୍କ ଘର ପାଖରେ ପହଞ୍ଚିବା ଅସମ୍ଭବ ହୋଇ ପଡ଼ିଥିଲା । ଗାଁରେ ନ ଥିଲା ଡଙ୍ଗା କିମ୍ବା ବୋଟ୍ । ତେବେ ଅସୁସ୍ଥ ବୃଦ୍ଧାଙ୍କୁ ପରିବାର ଲୋକେ ଟିୟୁବ ସାହାଯ୍ୟରେ ମୁଖ୍ୟ ରାସ୍ତା ପର୍ଯ୍ୟନ୍ତ ଆଣିଥିଲେ । ମୁଖ୍ୟରାସ୍ତାରୁ ତାଙ୍କୁ ଅଟୋ ଯୋଗେ ସ୍ଥାନୀୟ ମେଡିକାଲରେ ଭର୍ତ୍ତି କରାଯାଇଥିଲା । ଶୁକ୍ରବାର ଉକ୍ତ ବୃଦ୍ଧାଙ୍କ ସ୍ୱାସ୍ଥ୍ୟାବସ୍ଥାରେ ସୁଧାର ଆସିବା ପରେ ତାଙ୍କୁ ପୂନର୍ବାର ଟିୟୁବ ସାହାଯ୍ୟରେ ଘରକୁ ନିଆଯାଇଛି ।ସେପଟେ ଏହି ଘଟଣାକୁ ନେଇ ଦଶରଥପୁର BDO ଆକାଶ ପଟ୍ଟନାୟକ କହିଛନ୍ତି," ମୁଁ ଆପଣଙ୍କ ଠାରୁ ଏହି ବିଷୟରେ ଖବର ପାଇଲି, ଯଥାଶୀଘ୍ର ସେ ଗାଁକୁ ବୋଟ୍ ବ୍ୟବସ୍ଥା କରାଯିବ । "

 ଏହା ମଧ୍ୟ ପଢନ୍ତୁ...ଦୃଷ୍ଟିବାଧିତ କିନ୍ତୁ ସେବାର ସ୍ୱପ୍ନ ଅସୀମ... ବନ୍ୟା ବିପନ୍ନଙ୍କ ଆଖି ପାଲଟିଛନ୍ତି କେନ୍ଦ୍ରାପଡ଼ାର ସତ୍ୟ ନାୟକଇଟିଭି ଭାରତ, ଯାଜପୁର